Poetica del Buonumore

 

 

DONNA TURA

(Se hai difficoltà a capire il testo clicca sul titolo)

≈♦≈

 

Donna Tura a ru Comune fatigava

e ri marchi i bullu subba i pratiche ‘mpinciva,

dopu pocu chjicata subba a seggia s’addurmiva

e ‘ntu frattempu nu turriuni i carti si faciva.

 

S’abbussavi a chiru vitru ppe sapire ancuna cosa,

iddra prima u ti sentiva e ppo a stentu rispunniva.

 

U ssia mai vulivi sapiri i na pratica inoltrata,

murmuriannu ppe ru tempu,

Donna Tura sfastidiata ti faciva na piata

e ppi chira sfurfuliata, chira pratica inoltrata,

sutta l’ati ammunsiddrata ricughjiva purverata.

 

Ma si u Sindacu a chjiamava…

‘mpressa ‘mpressa si lizava, a cammisa s’ aggiustava,

chjiù buttuni sbuttunava, u russettu si mintiva…

e ra porta du Sindacu a ri spaddrji si chiudiva.

 

Sa chiamava l’assessore ppe girare ‘nta l’archiviu,

Donna Tura subba a scala a gunnella s’accurciava

e ‘nti vrazzi i l’asserore dopo pocu tummuliava.

 

<<Ohji, Marò mi vatte u core!>> ansimannu ci diciva,

e ra manu i l’assessore subba u pettu si mintiva.

 

Se a ra fine da sirata tu chiedivi

a Donna Tura cume è juta sta jurnata,

rispunniva a menza vuce:

 

<<Ohje... mi sentu scofanata!

 

Mo ci sunu l’elezione ppe ra giunta comunale

voghju fari l’assessore a ri beni culturali.

Sugnu juta fin’ a Pompei, viaggiannu pejiu ca pejiu,

a ccussì cu l’occasione e ppe fari chjiù dinari,

maju imparatu i ‘Lupanari’.

 

L’argumentu u mi pisava e ra pratica l’haju fatta

mo mi jettu a cap’ a funnu e a cussì che va ru munnu!>>

 

Tutti i sforzi i Donna Tura ara fine su premiati

e cunsigna l’attestati a poeti e letterati.

Ma sta pacchia dura ppocu e diventa accusatrice

‘mprovvisannisi scrittrice.

 

Cu i ricordi i nu pitturi cu u cugnume sfortunatu

e ri frasi i nu scrittori ‘nta politica ‘mbrattatu,

organizza nu librettu sventuliannu ch’ è cultura

e ra genti si l’accatta e si pia na fregatura.

 

I cultura nun c’è nente e de chjinu i fesserie

cume chire ca tu senti camminnannu pe’ ri vie,

I memorie e ri penseri, ca van’ essere nu vantu,

sunu chiri i quannu parri subba a seggia du varveri.

 

E ppe dire ste schifezze, a cussì senza ragiune

sa beccata a sovvenzione i na banca e da regione,

offennennu a destra a manca tutta la popolazione.

 

Cu sta scusa Donna Tura ‘ncuno sordu ha ricughjutu

ma la vita è n’altalena prima va e doppu vena,

e si u si’ abbastanza spertu quannu vota è ‘na palata

e ppi chiri quattru sordi Dona Tura è querelata.

 

U ssi sa se chista storia è canzune i fantasija,

ma s’ esistunu a stu munnu fimmineddre i chista fatta

e ca sulu cu u penseru duve passa tutt’ ‘mbratta,

tena a mente ‘sta parola ppe ra vita tuja avvenire:

 

<<Fighjicè … arrassusije!>>

 

≈♦≈

 

Anna Grazia Zurlo

11/11/2016

 

Visite: 26840