Poetica dell' ispirazione

 

Magarìa

(Se hai difficoltà a capire il testo clicca sul titolo)

~¤~

U mi chiedìre i duve vena 'sta magarìa
cu a pinna i ti scrivìre 'na canzuna.

Pò ddessere na parulicchia appassiunata,
'na mossiceddra o nu mumentu di malincunia,
e allura c' avvena u compimentu
i 'sti mumenti i sula poesia!

Ti pozzu sulu dire chiru ca sentu
quannu 'sta magarìa ara 'ntrasata vena!


Iddra, mi leja dinta cume 'na mamma
a cu u pozzu ammucciari nuddra cosa,
mi stenna a manu e iju a manu pighju!

Cìtta cìtta murmurìa, quasi mi detta...
cume nu chjiovu vatta e tantu spincia
ca a pinna haji piari cume u lampu.

Chjù m'arrimiscu e chjù iddra mi detta
ca para ca i penseri u su di mije,
e solu dopu, quannu a pinna posu
i chistu sturdimentu mi rispighju!

E cume a tija, ca stu mumentu leghji,
curiusu, sbiguttutu o divertutu

pur' iju leju e mi surprennu...

A tija ca invece pensi murmuriannu,
ca chiste su fantasie i pocu cuntu

ca a poesia sordi nu ne porta
e ca dici: << di sognaturi arrassusija! >>

Ti dicu sulamente na parola:
<< ca vivere si pò i poesia...
se lassi ca ti coghjia a magarìa!>>

~¤~

Anna Grazia Zurlo

21/06/2016

 

Visite: 30525